ماد إيزّان أ تيديكلت دا تّْبِّيت؟

أر نكّْومز، إيسّْرواس أغ زوند نيت

إيكاباڔن ن وُوطُّوف إيغ ڭيم زرين

نكَّواك أ سّلام نكّوا داغ إيمزّان

مان أ تاكَضيضت إيتّيريرن تزريت؟

إينبڭي نوْ لّي نميار غ أوسڭّاس

أ يادْ د إيغلين إي تيزي، أور أغ زرين.

إيمزّي د سرغ إيتّاڭّان إيس دّرغ

أسڭّاس ن واضان أكّ أور ژڔيغ

إيدّا نيت وول إيقنض أغ سيغ ژڔان،

إيژنژاڔن نُّون إيوْنّْد إي وْدرار.

إينڭبي د سرغ إيتاڭّان غ أوسڭّاس

نقل س أولموقّار، نقل س إيمژڔان

أد دّاغ نكّس إي وول أد نغ أضنّاي

نكّيس إيركان لّي ڭينغ إيحبّان

نكّيس إيركان لّي ڭينغ إيحضّان

مانيك أ تّْليت أتيڭ أ ياڭرّام

أ يايّور نْ أُوژوم، أيّور غا تڭَّوان،

ميدّن تاسوين د وُولاون أد جّين

مانيك أد تّْليت أتيڭ إيغ كينّْ ژڔيغ

أوسيغ أك ياد لهم إيغ را تّْدُّوت

ترشا غايد ن تاسا، نرشا غد نكّين

أمطا إيْڭا داري زون سرس دّرغ

أور أس نطف أكَينان أد تِّين ڭلين

أولا سّنغ أس أزمز إيس غار نڭين

إيڭ إيت أمسيفاض نغ إيڭ إيمژڔان

داود السوسي