ئنا وݣاما س ئمي يجيوي ياد ئلان
ؤف ؤر د ئميل ؤف أس ريخ أ ت ئد ئنيخ
ماش ؤر داري زو توتلايين أد نون
وانا يݣان أمارير ييني ما د نويخ
ؤسيخ د لعواد ؤر ت نبي غ ؤغانيم
نك أ يساوالن كيغ د ئصنصيݣ ئفوس
أكال ن ؤمزوغ أر ت ئسيريد ئليل
وانا يغالن د ئس أيس نكات أژاوان
نكيس د ئ واداݣ ئفراون زود أنير
ئغ ئژما روح ئفل د مامي قازن سول
ؤلا أملال ئفوس أغ را ون ت ئد أويخ
أد ئسݣل غيلي جو ور لكمن ئضرفان
ياكي د ف لبور أر ئتحادا تاݣانين
زود أيدي لعزيب ئغ يوكي غ ئهرتان
ئمون د ؤݣودي غ لخلاوات ئݣ ئميك
نيخ أيون تاماتارت ن واس ئغ ئروح
أر نسݣال أكال ن تكرزا زود أليم
ئغ أيسن تملا لمدرا نون ئݣنوان
ئورغ لحال ئس أغ ت ئتمنيد ؤرام
أر أيس ئسرووس لخلا غيلي غ ئلول
زود ؤدم أمهروش ن غويلي طاضنين
ؤلا أݣبور ئكون أر ݣيس ئراݣ ألوس
ئغ ئزوا ليدام ئسليونت ترݣينين
حاداغ د ئداوا نون كولو راد رحلن
ئغ أيسن لاح لبور ولا توزونين
نك أيݣان لموت نحكم غ لحضارات
تيغورما س تمازيغت أوال ن دارون
ؤكان ژرغ ئنوشوݣن ئس ئرا د ئلين
غينا ور ئفاقن زيك ݣين لبازارات
هان أنعيبار ئكمل أرا ما دارون
نفاغ د نكي غ لمنزل أد ئلا دارنغ
جمعاغ د ئجيوي لوقت أد ئݣا هاكاك
نيغ أيسن عيش أد أيون ݣان ئژوران
ؤلا كرا ما غيد ئسماتين أجاريف
ئغ ؤر يومر باب ن تݣلديت ن دونيت
مقار د ئسمضال ؤر تا جو غيد محين
أ ݣيس تمحوت أياو ن ؤݣيد *ئعاقلن
ئسمݣ وخا تاݣين سيديس أد ئران
ئما يغ أك ؤمرن أنژار ئرا د ئلين
ئما يغ ؤمرن ئ واينيون ما د ؤرون
ئما يغ ئرا أجيݣ ئكتورنت ترݣيوين
ئما يغ ئرا تاناوت أ تلكم د لحين
ئما يغ ؤمرن ئ زوند نكين أد نكرن
تيسومݣا نون أ ك ئد ييوين أزل سرس
تانا ئرا باب لامر أر ئتازن سرس
أقا ن واضو لي ݣيك والو ماد ئطاف
ئما لميزان ئݣوتن ئضوف لعليم
نضوف ݣيس نكي ديك غار منيد ن تيط
سول ئكلولان ئطاصن ئقن ئزيولن
را ديدك نتنيو تانيوت أس أد نكرغ
ئما يميغ نفل ت ئ ورومي زربن سرس
أكا ور ئميل ئصاضصا ݣيس لݣومان
أفود واخا د لݣاغن أعكاز ئقور
ئغ ئكلولا شوف لمري را تيد أوين
ݣين ؤسفان ئمازالن ؤر ئشرضن يات
لجيش ن ربي كيغ ئتنوشوݣ نعاونت
ئميك س ئميك أر أغ د ئتقصاض لخير
توريمت أ تاناسين س ؤزمز أد أطون
هان أنعيبار ئكمل ئفل ك ئد لحال
ئنا د يات ؤكان ئغژان يي ݣيسنت
ئساغ كا تالات ئ لحوب لحوب ئموت
ياݣور د ؤنزݣوم ئ غويلي ت ربانين

 إسماعيل أبلق