تارݣينين
لاي لا لا لا لا لا لا لاي لا لاي دا لال
تومغارين أد ن تاݣانين كولو حزنين
ئزد ئس ئمنعا لحيال ئزد ئس ئزري يان
ئزد ئس ؤر ئلي وسمون ئزد ئغايب ئموت
ئبضو كنت ؤمادل س ؤمادل أمادل ئقور
ݣين د ئزاݣن زود أضان ليالي تݣرسين
ݣار تيملحافين أياد أغ دي تيسݣينمت
لوژرا د لقش أد ئميل نميار أ تژيلمت
أر ت ئسمليويل شباب ئسوو د ئݣر أفار
ماش دا د ئݣات ئريفي يا ور ئناژن أمان
ئكس أسن تيخرسين ئورغن زوند لمال
ئكس أسن توجوت ؤلا صاحت ئضر د ياموم
ئفل أس أشاكوك ئݣان ئفريݣ أد ياسوس
نانت أخ أخويا يان ئفل زمان ئسدولا ت
ئجلا يان ئتاسين أقاين أد ؤوژاطيم
شين ݣيس مدن ژورن داوان ما د ؤر داوان
أر ݣيس نكات ئمودال نش تيلي زوانين
زوند أزرݣ ئغي غ ؤزرف نس أضو تغوييت
أيهايا ما يي د ئفل سول غيكاد واطان
وين واكال أد ئنو لي مو ؤر أكا يݣينان
وين واراو ئغا د ئتمغور س ميا ن هاكاك
وين يان ئفلن ئ توجا درهم أر ئغ د ؤرين
أر دي ئتيݣوت ؤكابار ن غويلي رژمنين
وين يان أك ؤر ئسن ئس نژما زايدن سول
وين ݣار أسماقل كيخ ئتهم تارݣينين
نامژ لويجاب لويجاب أيݣا تيبراتين.
إسماعيل أبلق
تيزنيت 24 دجنبر 2024م
لا تعليق