تامغرا ونزار
لا لاي لا لا لا لاي لا لا لا دا لال
أكا سلام نزوزور ف مدن غ ئجاوان
ݣات ألجاوي تاݣوت ماد ئخلض نتان
ݣين ئتران ؤماز لجوهر غ ئݣنوان
تافوكت أتاݣر غ ؤحبو تالوبانين
ئقن د وايور نتان تيط ئناد ئفرح
وانا يفرحن كاراغ تنت ئسنبيقيش
ݣين ئتبيرن درس أد لوحن س ؤزاوان
نغ ؤتن رش ئ يونزار أتيد ئنين
ئفرح كويان ئ ضرب ݣين ئ ضرب أفوس
ها ݣانݣا ن ئݣيݣ أسداو أياد ؤرمن
ئلوح مولاي ئ ميدن أقاين د ئميم
وانايݣان لعار نس أرا تيد ئقاي
تلسيمت أ تامواليت ئزاݣن دلملف
نغ ئكلان أكولو كلون منيد ن تيط
ئسو د مارس غ ئݣي ن واكال ئݣرتال
ئݣا ݣمام ݣمام ئسكر س لعادا يان
ها تادليوين رزمنت أك ئ توجوتين
ئبرك ؤماضال أيماريرن دارون
ئبيد واييس مقورن أر ئزاض أكال
ئوين د أنمغور ئيماريرن دلحين
زود أرݣاز لي ياغ تمضل توزونين
ؤلا غويلي د ئفل غ واسيف ن هارون
ئنا صلا وسلامو عليك أ نابي ناغ
هايي ݣريغ أمود أنكرز نكرز لخير
ؤوسيغ د أوولو س ئݣر أغ ئݣ ئضرفان
ديخ ؤشكيخ د غليلغ أون تيݣرسين
أر ئسوا ييالهي ختانا غيد نلوح
ئغييت ربي غ ؤسمضل أمود أد نكرن
أت ؤر ياسي ووطوف ياسي ت ؤهاقاي
هان ئزضار أد ئباعت ئضي تيزلفين
وانا يݣان أموسلم ييني يي د أمين
أسيغ د لميزان لعبار ؤرا د ئطار
نيغايس نرا ݣيك أهيا تيدوݣامين
أوال مات ئݣان ئغ ك ئسوسم هولن ك
ئنا أنزار ئلا لوقت ؤرا تاضن سول
ييلي لخير ئفيد ؤر سول أتازومنت
ييلي لفرح لقرح ؤر سول أتيد نطاي
ئتاهل ؤمازيغ ئسمون أد ئضوران
أر ئسكار لعادا ن ويلي تيد ئفلن
غاساد ݣان لفرح ن غويلي تاهلنين
تيلي درانين أر ئغ نوفا تيزيكرت
اسماعيل أُبلق
لا تعليق