تاوجا ن تافوكت
لا لا لاي لا لاي لا دا لاي لا لايل
أتيط ئنو أ تاش سيݣل س ئكنو نونت
أليغا تناضارت ئݣي لا م ياتوين
ئس ؤر ئخشين أيسيݣل يان تافوكت
ئغ ؤر ئرواس ئتري دومن غ توفاوت
بلحاق أ لويز ؤر يوݣي يان تاما نك
ؤلا تان ت ئݣان تاݣلت ئ تملحافت
أ تافوكت أ تالجوهرت ئسمرقيين
أر أم نتسوتول زود ئغا تسوتولت
واياهو تمي ن ؤزواݣ ئمي ن تيووتش
نسيݣل كم نقرغ تيݣورا ن توفاوت
أسول ؤر نيلي غ واضان ئغ تاسوست
نكي دا يلولن غييض ئكرمن ئلاسن
غاسا د ئݣضام أس راد يي توراخن
تاسي ياغ نانا زغ ؤباشيل توت أنغ
ئبي ن لعوين ؤوبوض نلال غ ئفاسن
أح أيا تكوضي ن تودرت أف ساقورغ
رژمغ ألن ئݣا وماضال ئنو ئلاطن
أها ماد ݣيغ أج ما داري نتلغ أم ت
هايي ݣيغ يان ؤرݣاز ئران تانيرت
أيي تال س لفلك “ناژ” أيور ف ئكالن
أر ئغ نميار نژر ئݣنا س تيط ئنو
يارود ؤسکرض أشكو ݣان أغ تاقايت
نسن تاوجيوين ياضن لي ور لكيمغ
ئما تين واكال توݣر تين تامونت
ئلا ياغ ݣيس ؤحبيب ئسا تكوفورن
يويل يي تکيضا ور أد أكين س لحيلت
ئغ أسن بدرغ أنݣيدي نان يوف أنغ
ئغ أسن بدرغ أيدا دان أغ ت أك ئفل
يوفا داغ تودرت غ ؤݣنس نك أ مارس*
ئغ أسن بدرغ ئد بابا نان ساكي تن
لحاصيل وانا سكابر لامرييا نس
ؤر أغ ئسموقول غ ؤضار أر ك ئتاكل
تيليس أغ تودرت غيد مقار سومرنت
تلهوت أنغ أ يام زرب أتوتم ئفاسن
ئواعاقدات أ وليدي وا لحسين
إسماعيل أبلق
تافراوت 22 ماي 2024
تاماوالت:
* مارس المريخ
لا تعليق