تيزي ن تومرت
لا لاي لا لا لا لاي لا لا لا دا لال
يان ؤخريب حملغ أد كا ݣيسن ضوورغ
نكا د ݣيس أݣنس ئنو أون تيد نمال
كيغ ؤرتا د ئضير أشكو ران أد ئطار
لكمغ تين ئݣا يا لبرج أر ئݣنوان
مات أݣما يوسين لواسيس ئݣ أكال
ؤلا أغراب ئݣات ئݣ ت ؤزور ئدل سرس
ئزيغزيف أس ربي نس ؤسان أد ئلين
أليم كيغ ئخلض د ؤفزا مارا د أسين
ئصاضسا كولو غايد لموهنديسين
نصاضسا يظبيبن غ تودرت ندر سول
نصاضسا كولو ميدن أتيݣ أد نرور
يان ئݣران أسول ئضصان ئسيݣوت أس
غار ندحي ن أݣور ئزبي يين لدين أغ
ئسونݣو سنغ أسونݣو ما را د ئنين
ئديو د ئشيري لي ور ئشيبن ݣيتنغ
أر ئسيافا ماس ئسيافا تيديكلت
ئعرق تن واضو ن ؤسغار ئغا د ئكات
غار ئكضا ت ئجي فرحن ؤر ئتاضن يات
أزلغ زود أزان أر تيوا نرزم تنت
أج أ لعاقل تاساعت أ تاز ئ وول
تيزي ن تومرت أياد ݣات اغ أزيوال
ؤريغ د أ يان ئنان خيتوس ئدا ياغ
يان ؤنوال ئݣان ؤصطيف ؤر ئجييرن
كولو صبر يامي غ لخلا كا سا درقان
ݣار أسݣو تورا سرس تودرت نݣا تنت
ئݣ ؤقبيل ئبوكاضن ؤر ؤݣيزن يات
غيكان د ؤل ئنو ݣان سرسنت أبركان
نشا لوابا لاز ئسنو يي تيد نشا ت
ئݣ ؤغݣمي يان ؤبريد ئشيض نكا ت
نݣا ن ݣيسن شالا د ويلي سودانين
توفاوت ئميك ن تونفوسين أد أنيغ
مانيك س نسن غييض غ ؤزال نݣاميت
تيغاوسيوين أنيغ كولو موضرسنت
تالونت ؤلا أجنوي ولا تيݣلزيمين
د ؤزرݣ د ئفݣيݣن د واݣا د ؤبوقال
ئماسن ؤومݣوف ئنرا ت ؤزمز ئموت
ماش ؤر د ئفيل ئ تاروا ما سا د نكرن
ؤلا ملان أسن مانتا س ئرا د أسين
أيوت يان أفوس نس ئزنز ئبالاك
ماش أݣدود أغين ئدعان ؤر ئݣي يان
نمون د ئسكفال ؤر ݣيݣي زرب ن يات
زو را نغي تاسمغورت أيي سمغورنت
ياك أون أ بابا را نغي تيسمغورين
هان ئس كا ساولغ ؤر د نرور أضمليل
ئشيب د ئݣنزي ن ؤغراب ئݣ ئضرفان
ݣان أك تيستغين أشكو طازيت د لخوف
لكمغ تاحانوت ئسم ؤكان أݣيسنت
ئݣا د سول أ ييمي نو ئمرزيݣ ئميم
توري د غيلاد أتاضفي لي زود أتاي
ناسي د ياودليس ؤورومي ما د ئمال
نزل غ واكال أر نسموقول أغانيم
غيكاد نيت أس أغ أقراغ ئليغ أقراغ
ماتا لجور أد أيادليس ئلا ݣيتون
تاساست ئميك أرا تݣ ئݣورو د لفرح
ئما لموت نكي ديدك أد ؤر ئداومن
ئبيد وازار ن ييلم ئنو زود أمار
نازل د غ ئسكفال ؤر د لسيغ ئدوكان
غار ئلكم د ؤضار أنرار ئضرد ئترس
ئوا علا سلاما يرا ياغ ربي سول.
إسماعيل أبلق.
تافراوت غ 17 براير 2024
لا تعليق