صّولوح ⵚⵚⵓⵍⵓⵃ

صُّولُوحْ

ݣَانْ كُولُّو تِينِيكِينْ ؤُزَّالْ تْلْكْمْ تْنْ تْرْكُوتْ
دُوسْنْ ئِمِيلْ ئِسُوتَارْ
ݣْ ئِيّْوَالِيوْنْ مْنَّاوْ أَجِّينْ تْ أَ تَاسِي وَامَّانْ
ݣَا يْسَافَارْنْ تَاكَاتْ ئِݣْ ؤُمْحُوكُّو تَاسَّاسِينْ
دُوسْنْ ئِمِيلْ ئِشُومَاشْ ئِݣُّوتْ مَا كُولُّو تَّاسِينْ
هَا يْحُونَا خِييّْرْنِينْ
دْ ئِكْلَانْ تّْيَاصّْلْنِينْ
دْ ئِنْوَالْنْ سّْنْوَانِينْ
دْ لْخْوَاطِيرْ مّْرْنِينْ
ضْرْنْ غِيلَا سْ ؤُمْرْشِيشْ
زِيكّْ نِيتْ أَ سُّولْ ئِلَّانْ ئِغْ ئِتّْيَامَارْ أَ تْنْكْرْمْ
ݣَاتْ كَا يَاسّْ ئِ صُّولُوحْ أَجَّاتْ كُولُّو تَانَّايِينْ
عَاقْلَاتْ أَ يَانْ ئِرَانْ لْعَاقّْلْ أَ يْسْكْرْ مَانِيكْ
هَانّْ كُولُّو مَانِي غْ أَكْ رْژَّانْتْ أَغَا تّْلْحَامْنْتْ
ݣْ أَيْسْنْتْ تِيغَانِيمِينْ أَدْ ؤُرْ تْمْيُورْ أَكُورَايْ
ژْرْ غْوِيلِّي كُوشْمْنِينْ ؤُضْنّْ كُولُّو مَاطْلْنْ ئِنّْ
بِّينْ كُولُّو تِيفَارِّينْ
جِّينْ كُولُّو فْ ئِتْرْسَانْ
ݣَا لْوَارَاتَا مْنَّاوْ ئِݣْ أَنْغْ ؤُكُّوسْ ئِمِيكُوكّْ
ݣَارْ تِيطِّيتْ أَغْ أَنّْ ئِطّْرْجُو ؤُسْمْسَارْ ئِشَاطْرْنْ

غَارْ مُونَاتْ أَغْ أَرْ ئِغْ نْݣَا ئِ لَاسْطْوَانْ لْحْرْشْ

ݣِينْ مَاغْ نْتّْمْشِيوِّيرْ

دَا نْسْمّْسْتَايْ ؤُسَّانْ ئِݣِيوْرْ ئِرَا نِيتْ تَاسُوتْ ئِݣِيوْرْ ئِرَا مَافْ أَوَالْ

زِيكّْ يَانْ ئِنَّانْ ئِمُّوتْ أَهَا لْقُوسْ ئِلَّا فْ لْقُوسْ ئِݣْ لْحْيَالْ تّْمَاتَارِينْ

دْ ئِتْرِي تَامَا وَّايُورْ

دْ لْكْنَانْشْ مَاطْلْنِينْ

دْ ئِسْمَاوْنْ لِّي تُوسِيمْ

دْ ؤُحْوَاشْ تّْوَالِيوِينْ

دْ ئِمْنَايْنْ وِينْ لْخِيرْ

غَاسّْ يَانْ ئِنَّانْ ئِسُولْ رْژْمْ فْ تِيطّْ نُّونْ رِّيشْ

دُويْ نِيتْ أَ يَانْ ئِنَّانْ ئِدُويْ يَانِي تُوفَاوِينْ

دَا يْسِيفِيوْ ؤُمَايُّورْ ئِضْلْسْ وَانَّا كْ ؤُرْ ئِرِينْ

ݣِينْ غْ ؤُفُوسْ أَقّْرْيَانْ

هَا خْتِيلِّي سَّالَّانِينْ

ضُوفْ تْنْتْ غْ تَامَا نُّونْ

دَا سْغَارْنْتْ تِيطَّاوِينْ

ݣْنّْ وِيلِّي سِّيكِينِينْ أَژُومْنْ ؤُرْ ئِلِّي يَات ئِمْنْدِي نْ وَاسّْ ئِ يِيمِيلَاسّْ

دْلْنْ سْ ئِلْمْ سُّونْ أَكَالْ

دْ ؤُكْمِيسْ ؤُرْ ئِتَّارَانْ

دْ لْمْسَايْلْ كُولُّو تْنْتْ

دَا نْسْمّْسْتَايْ ؤُسَّانْ ئِݣُّوتْ مَا يْسْتَايْ لْخْلْقّْ

زِّيغْ تَاسُوتْ أَغْ ؤُرْ نْمَّاݣَّارْ وَخَّا نِيتْ نْمُونْ ئِݣِيوْرْ أَرْ ئِتّْنْفِيتِّيسْ

ݣَا يّْوَِالِيوْنْ مْنَّاوْ

هَا كْرَا رَانْ أَ تّْ ئِلُوحْ

دَا تّْقَاوَالْنْ سْ لْخِيرْ ئِغْ ئِسْكْرْ وَايَّا سْ ئِمَالْ لْهِينْتْ أَسَا يِّي تِّينِينْ

هَا كْرَا رَانْ أَ تّْ أَطُّونْ لْبَالْ كَا مِي تّْ ئِنّْ ؤُسِينْ

هَا كْرَا رَانْ أَ تّْ ئِصْلْحْ ئِݣَاوْرْ أَرْ أَسْ ئِسِيلِّيفْ

هَا كْرَا ئِكْتِي فْ لْوَالِيدَايْنْ ؤُلَا لُوصِييَّاتْ أَجِّينْ لَاسْطْوَانْ رْحْمْنْ

دْ نْكّْ مَا رَا وْنْ تِّينِيخْ

ݣَانْ كُولُّو تِينِيكِينْ ؤُزَّالْ تْلْكْمْ تْنْ تْرْكُوتْ

ݣَا يْسَافَارْنْ تَاكَاتْ ئِݣْ ؤُمْحُوكُّو تَاسَّاسِينْ

دَاسّْيَافَاخْ ئِغْ أَرْ ئِطّْرْژَّا وْشَامُوشْ ئِتَّاسِينْ أَزُورْ يَاسِي تَاكَاتِينْ

دَاسّْيَافَاخْ ئِسْ أَغْ ؤُرْ ئِدِّي لْحَالْ ؤُلَا نْلْكْمْ تْ

اسماعيل أبلق