ؤرا كا سكارنت تݣنزيوين تاقورت
ئغ ؤر ئتعادا وضاض ئمرق ئ ييلم
غين أغ ئحتاجا لقاضي مايس ئمالن
تالي د ئسحوران تاضوري يموسلمن
ئغ ئݣا علاخير يودو ت ئسم ئشمت
يارا تابرات ئغ ياد ؤرانت محوتن
دا تنت ئسكار ئ لجاهيل ئخف ئقورن
داتنت ئسكار ؤنعيبار ن تمورانت
أج أييخف أد ئنو لهول ئسنوفل كن
تاجيم أجماك ئ لحوب ئرا كن ئسوسم
تاجيم أسمامي ئغ ؤضنخ نقن ئمي نو
ئما تاكزين أغ ياد أنيغ تيووتش
أتافوكت نضوف تازوغي ن تيط نم
ؤلا تيسݣيني محادا لارياش نس
ئݣا غاس تيلاس درهم كايسيفيون
تيريت أ كرا أطامزم دونيت س ئفاسن
ؤر ئلي دوا غ لكنوز مقار تن طافت
ئغ ؤر ئسموقل بنادم يان خاصانت
أ سرس ئسݣيدي يلاهي تامناط نس
ئفاغ لحساب لحساب ؤرايس نفرتل

إسماعيل أبلق