ؤر ئِلْكِيم لْحال ف أد يِيلِي ؤُفْرَانْ ( النقد) غ تدلسا تمازيغت سلاواند أك غ ئزماز ن غيلاد أيْلِّيغْ ئِلَّا ؤفراك سول ؤکان ئتيݣوتن ئس ئِفُوكَّا أَدْ دْ نْمَّاتي غ ؤسݣودي س يات تݣراولا نَاحْيَا غ وَانَاوْ نّْسْ. تاووري ن ؤنفران أد سول ؤر تݣ غار أستال( التقويم) ن تغاوسيوين لي توسكارنين. ئلا فلاس ؤلا أد نّْ ئِژْرْ ئِسّْفْرْكْ ف تسݣيوين لي رانين أبوغلو أفْنْتْ أس، ئمل د تيدوسيوين د تزضارين ( الطاقات) لي نتلنين، ئسفرك ؤلا س تْبَايْطَّارِينْ د لهرشان لي راد ئسبد أسْنْفْلُولْ ئِرْژْ تْ.
أَدْحَّايْ لي دْ باهرا ئِسْحُورَّانْ أفراك أد دار ئِمْسْݣَّارْنْ ن تدلسا تمازيغت تاماينوت ئݣا تّْ غايلي د تيوي تْزْمْرْتْ(مرحلة) أد ن ؤكشوم ن تمازيغت س تمرسال( المؤسسات)، د أيلي ترا د توݣاس تيغردين نْ ما تْسّْفَالْ تْنْكْرَا نس غ 2001. د أيلي كولو د ئمون ماياد د ئناروزرن ؤلا ئسقسيتن.
أوال ن واونك( الدولة) لي د سوفغنت تْغْنْسِيوِينْ ن ؤموسو أمازيغ ئسماتي د تمازيغت غ تسݣيوين تُّوفَّالْنِينْ س ؤݣنس ن تمرسال، سلاواند أك تين ؤسلمد ؤلا تابادوت. أيلي داغ ت ئسلكمن ف كرا ن تغاوسيوين ياضنين تيماينوتين نا تّْمُونِّينْ د ئموسوتن ن ” ؤزمز ن تزميم”( عصر تدوين) نْ تْمَازِيغْتْ. أزمز أد لي غ تياوسكار تووري ئركسن ئݣوتن. غ تْرْسَالْ (قواعد) ن توتلايت، د ؤسكر ن ئماوالن، د تزميم ن تايسي تاميوانت( تراث شفهي) د تغييز ن تْدِيدَاكْتِيكِّييْتْ ن ؤسلمد، د ؤُفَاسْرْ ن تْمِيتَارْ ن تْدْلْسَا، د ؤسنوبش غ تْزمَارْ لي لاسنين غ ؤمزروي ن لمغرب، د ؤسّْلْمْدْ ن يات تَاسُوتْ تاماينوت ن ئعريمن سنفلولنين. تيووريوين أد لكمنت نيت ف كرا ن ؤسماقل ن ؤفران ئدوسن. أيوا تَامَاسَّايْتْ( المسؤولية) أد تضر ن غ ئݣي ن ئغاريون ن ئنفران( النقاد) غ كرايݣات ئݣر.
أكشوم ن تمازيغت س ؤسلمد غ ؤسݣاس ن 2003 د تبادوت غ 2006 _ مقار ن ؤر توفي تِيݣْضِيفِينْ غ ؤبريد نس، تاف ن ݣيسنْ ئِمْشْكِيلْنْ _ ئفكا تانايين ياضنين ف ئمصِيريضْنْ ن تْغْنْسَا د تَانَّاييِن نس. تّْيَارْمْنْتْ تانايين أَنّْ زوارنين ئلينت غ ؤفوس، فاد راد رژمنت ئݣورا أر ئغربان ئ تووري ن ؤفران ئدوسن. أود ليغ ئشيض ما نّْ كيسنت ترسال ن تمازيغت مَّاغْنْ ئد بو ؤسنفلول أدْ دْ سَّاشكين تيرا نسن د ما ئتياوسكيرن غ ؤمدور أد. ؤُرْ نْتُّو ئس د ݣوتن ئِمَارَانْ ( كتَّاب) ن تمازيغت غ ئعريمن. ؤفان د تانكرا تادلسانت ن تمازيغت غ تامراوت ( العشرية) أد ئݣران. أيلي د ئضين ئِمُوسُّوتْنْ ئماينوتن غ ؤسنفلول أسكلان ؤلا ؤناژور أك باهرا. س ليغ نيت داغ بُوغْلَانْ ئسقسيتن ن ؤفران.
ئِژُورَانْ ( الجذور):
ليغ ݣان ئِنُوشُّوݣن ن تمازيغت غ ئِسيزوار غار تاغنسا ( نضال). ݣانت يان ؤمصيريض نّْ ئِتّْژِينْ د لجماعت ن تْسْرْتِيتْ د تْرُوبَّا ن ئنمغورن ن تدلسا باش أد سكشمن تيغاوسيوين ن تمازيغت س ؤݣنس ن تْمْرْسَالْ. أژماژل أد واحدوت كا غ ن ژْرَانْ ئمسݣارن ئس را ياري تايسي تامازيغت غ ؤنغوبو( الاندراس) لي د سرس ئشورن. غيكاد أف يادلي ؤر سيافان ئمغناسن ئس ئطاف ؤفران تاووري نس يُوغْدْنْ، ؤكان سكرن ݣيس يان ؤغاراس ن ؤسْنْمْلْ ن تووريوين تيسكلانين. ئݣا دارسن غيكان يان واناو ن “هَايِّي لِّيغْ” ؤݣار ن ما ئݣا أَسْتَالْ د ؤُفْرَانْ.
أراتن لي زوارنين غ ؤفران ن تسكلا كانت فلاس تمژلاي ( خاصيات) أد:
١_ ئݣا باهرا غار قَّامْ قّْرَايْ د ئسيسفيون. ييݣوت ݣيس ؤسيافا س واتيݣ ن تماݣِيتْ أشكو تلا يادلي تغوفي تكا د أسْمْژيي أدلسان ( الدونية الثقافية)( غيكاد نيت أد ن نتفاغ غ تيرا لي زوارنين زود تين محمد شفيق غ ئسوفوغن زوارنين ن تسغونت ن ” افاق”، تسغونت ن اتحاد كتاب المغرب غ ؤسݣْاس ن 1995 د احمد بوزيد غ تسغونت ن العلم ݣْر 1972 د 1975 ؤلا عمر أمارير غ ؤدليس نس ” الشعر المغربي الأمازيغي” لي د ئفوغن غ 1975 ). أوتاس ن ئنفران أد تݣا ت تْرُّوکْزَا، كين د سرس تاسكلا د ؤمارݣ ن تسوينݣامت باهرا(أميوان، شفهي). أمارݣ لي يولن ئمي نس ئفرز أوال. ييلي ݣيس وول نس، ئسمغر ئخف نس، ئماغ ف تدرفيت ( الحرية). غيكان أف د ستاين ئضريصن لي سنين ئ توتلايت أد. ݣين تيميتار ن تروكزا د تژيضار( سلاواند أك ئضريصن ن ؤمارݣ ن تنزبايت ( مقاومة)، د ؤفران أدلسان د ؤنامون…)
أيلي أغ ئمالن ئس نّْ سفالن واراتْنْ ن ؤفران غ ئضريصن ن ؤسنفلول ئقبورن. ليغ ؤرتا ئلي ؤسݣودي نْ ؤزمز أد غ ما ئݣْانْ سنفلول أسكلان أماينو. تاغوزي ن ئژوران غ تيزي أن أف باهرا تسكر تاسوت أد. تماغ د تسوينݣمت ن ” تماݣيت تانامورت”( فكرة الهوية الوطنية) لي ئرانْ سوا غ كرايݣات. أد كولو نمرويس نسكر يان ؤدم أشكو ئلكم ؤوانك تيزي أن ف غيكاد، باش أد كا ئبد ف ئضارن نس.
٢_ أر ئتزْرِّيرْ ؤفران أمزوارو باهرا غار س تُومَايْتْ (المحتوى) ن ئضريصن. ؤر ن ئقيل تاسݣيوين ن وافولكي د تژوري ؤلا توتلايت ن تسكلا لي ئݣان تامامكت ( أسلوب) ئژلين غ واوال ن تژوري. أود ليغ د يوتْ ؤزوو ن تْمَارْكْسِييّْتْ غ تيزي أنْ كضونت ئنفران ئمزوورا، توݣت ݣيسن، ماغن ئلما غ ئسنوبوشن نسن ما س ” ؤُغْدْنْ” ئضريصن أد ( ؤغدن ( ملتزم) س لمعنا ن ؤزمز أنّْ).
٣_ ئِمْفْرْنّْ ئمزوورا أر سكارن أَسُوغْلْ ( ترجمة ) ن ئضريصن ن تمازيغت س توتلايت تاعربييت. يات تمامكت لي س راد ملين أتيݣ نسن ئ غويلي غرانين غْ ئد بو تدلسا لي ؤر ساوالنينْ تامازيغت. ئݣ ؤسوغل أن يات تماتارت ما ن تژرا لجماعت ن تسرتيت د لْكابراناتْ نس. كرا غ ؤسوغل أد زود ئغ ئسكار ئ واوال أد ئِنَّا ئلا ؤزداي ݣر تدلسا ن تعرابت د تين تمازيغت ئغ را ن هْلِّي قيلن تامݣاروت أد ݣيسنت ( غيكان أر ت نيت تمال تغاراست لي س يورا احمد أمزال أمارݣ أميوان ن تمازيغت تيغردين ن تسيمانت غ تدلا ن ” أمانار” 1968). تيزي أن ؤر ئهريش ناحيا ئغ ئلا ما ت ئتينين غ تماݣيت ماش أد زوار تسوݣر تعرابت د تموسلمت أشكو ئلا لحيز أسرتان ( حجر سياسي) ف ئماون، ئكا د سرسن أبداد ن واونك.
تاغاوسا أد تݣا غ أكود أن يات تْوْدَا د تكصاض أر ت تسكار تماݣيت ئغ تبضا.
٤_ نژرا ؤلا ئضريصن ن ؤفران ئمزوورا لي سنوبوشنين غ ئسنفلولن ئماينوتن تيارانين( غويلي د ؤر فوغنين بلا غ 1981) ران أد سكرن ئديس ئ تيرا ن تمازيغت أد ݣينت يان ئميغ س ئمال. تاوالا ن واوال د ؤزرف لي تاكا تايسي لي ئلان دار ؤݣدود ييلي غ ؤمزروي ؤر ئتوفكا ئ ئسنفلولن ئماينوتن تيارانين غ ؤمارݣ ؤلا تاريوانت ( نثر)، ويلي حرا سفالنين.غيكان أف سرس ؤر سهيمان. نژضار أد نژر حتا أزداي لي ميارن مدن ݣر تمازيغت د تمازيرت. تايوݣا ( ازدواجية) أد ن توتلايين (تاعرابت/ تافرانسيست) ؤر سول توجي ماني غ ن تشكم كرا ن توتلايت ياضنين غ ئݣر ن تيرا. زعما أد تݣ أوال ن واونك( الدولة). أيلي داغ ئمالن ئس لكمنت تيرا أن ف أسنت زوار ئتوفكي ؤزرف أد نانت أوال نسنت، ملنت د ؤدم ن ئمال لي حبانت. نتنتي ئغ ن تيتيت أد ئݣان أژماژل زوارن غ توادا لي راد ئسكشم توتلايت د تدلسا تامازيغت س ؤݣنس ن تمرسال د ؤسووري سرسنت غ ئݣر أماتاي ( المجال العام).
٥_ ئضريصن ئسكلان زود ؤكان ئغ ݣان ئميوان ؤلا وين تيرا ؤر ضفرن كرا ن ترسال. أر تياوسكارن غار س تانايين ن ئنفران نغ وين ئد بو ئسنوبوشن. ؤلا أستاي ن ؤسكيل ن يات توتلايت ؤر ئتنباضن ( لي ئسيويدن أوانك أنامور _ الدولة الوطنية) ئضفر غار تيديولوجيت، تسغي أس أسكيل ن توتلايت نا ئتنباضن( تحكم).
٦_ تيرا ن ؤفران ݣانت حتا يات لبوشارت أشكو أوتاس نسنت ئݣا ت ؤسفوݣلا س تووريوين تيسكلانين ( أعمال أدبية). زود تازرارت ن تلاليت ن يان ؤسنفلول أمازيغ ئتياران، نا دار نيت ما ئتيني. غواد ئݣا يان ؤسماقل ن تولغا. ؤر أغ ئژرا شحا لي ئلان غ تووري ؤلا تيزݣالين ن تيرا أشكو نتا ؤر أغ أك يادلي ئتلي س ما ئتافا غ تمامكين ن تيرا، ؤلا أر ت ئسراس منيد ن غايلي ئتياوسكارن غ ؤسنفلول أسكلان ن توتلايين ياضنين. ئݣا يادلي دارسن ؤسنفلول أمازيغ وار أناو. أسماقل أد ئكا د أسيافا ن ؤسمژيي لي ئدحين تيووريوين دار تغنسا د ئميغ ف تسيمانت ( الاستقلال) أد د رارنت أسمغر نسنت.
٧_ كرا ن تيرا ن ؤفران لي زوارنين ماغنت أد سلاينت ئژوران ؤلا أد ملينت أزداي ن تسكلا تامازيغت تاميوانت د ئمان أنفݣان( الروح الإنساني). غيكان أف سوورينت ف ؤسمزازال( مقارنة) ن تسكلا تامازيغت د تسكلا تاماضلانت ران أد أس ن سَّاژْنْ ئضريصن ئميوانّْ. ؤر د غار ف ئمان أنفݣان لي ياتوين ف تژلايين ن تمازيرت. ئݣا غيكان ؤلا أسيفسوس ن لحيز دتازايين لي أس تسولي تدلسا تاعرابت تاموسلمت.
٨_ئسنوبوشن ئسكلان لي زوارنين سهيمان س تسكلا تامازيغت كَّانْتْ باهرا (أشكو تيغري تاكاديمييت ن ئنفرات ئمزوورا) ئغݣميتن لي غ توغري تعرابت د تفرانسيست غ تسداويت (الجامعة). ئفاغ د ؤموكريس ن تبريدت ؤلا وين تݣوريوين ن ؤفران. ئنفران ئوين ف غايلي غران غ توتلايت أن سكرن ݣيس أسقول غ تبريدين ؤلا ئرموسن ( المفاهيم). سوورين سرس غ تسكلا تامازيغت. أيوا غيكان أف تݣا تيافوت ن ؤفران أد أسمود ئ لحيز لي ياد نبدر .
ئسنوبوشن أد ؤر ݣيسن غار تانايين ن مدن لي غرانين لمدن مناوت توسنيوين، سرسن ئوتا غ نݣراتسن د ئضريصن ن ئلس أمازيغ، ݣيسن ؤلا تيميتار ن ؤضفور ن يات تدلسا ئ تاياض. أضفور لي را ؤر نرمس بلا ئغ د نكتي لمنزل أدلسان أناماس (الثقافة المركزية) لي يادلي ئلان. غيد أغ ن باهرا فلنت تغوريوين ( الدراسات) أد. أد غرينت تاسكلا تامازيغت غ لمنزل أسوينݣام لي غ د تنكر د تژلايين تيدلسانين نس. حاقان غيكان أدْ نّْ أنيغ ئݣا أديف ن تموكريست لي ف د ئمون ؤلموقار أد.
ئغ د مغين ئژوران ن ؤفران أسكلان غ ئسݣاسن أد زرينين س غيكاد لي ݣان. هيا مامنك راد ݣينت تووريوين نس غاساد، أيلي كانت زرينت تزمار أد لي غ ن توت تدلسا تامازيغت كرا غ ؤبريد نس غ ؤزمز أد أماينو زغ تمراوت تيس صضيصت؟ غواد حاقان أد ئݣان أسقسي لي ئسيحيلن ئد بو ؤلموقار أد.

تيووريوين تيماينوتين ن ؤفران أسكلان ن تمازيغت:

أنفران أمازيغ أماينو يوفا د أݣايو نس غ كرا ن لْمْنَازِيلْ ؤر د ݣيسن ؤفين ئمزوورا ئخفاون نس. لمنازيل أد غ ؤفلا ن واوال دارسن كراط تمژلاي ستاوهمانين: غ يات تسݣا نماقارن د د ؤکشوم ن تمازيغت س تمرسال ن ؤسلمد د تبادوت أك باهرا. غ يات تسݣا ياضنين ئبوغلا ؤفراك ن ؤمركس ن تماݣيت د توتلايين غ لمغرب، ئوين ت د ئموسوتن ئݣنسانّْ ؤلا ئماضلان. غ تسݣا تيس كراط بوغلانت تيرا ن تمازيغت ليغ نژرا منشكدا د واساغن ئماينوتن ن ئعريمن لي د كشمنين تاسكلا غ كرايݣات أناو ݣيس.
تاغاوسا لي ئزوارن أر تاجا أنفران أد ئغييز توسنيوين نس غ توتلايت د تدلسا ن تمازيغت. ئلين دارس ئماسن فرسْنِينْ، تيلي تغاراست تاماسانت. أنفران ݣلين ت ن يادلي ئفلوان ن تينمل س برا. غيلاد نزضار أد نسمون أفران د ؤسلمد ن تمازيغت د تسكلا نس. زود ؤكان أسلمد أمزوارو ؤلا وين ؤسموتݣْ ( الإعدادي) ؤلا وين وين ؤسينان ( الابتدائي) ؤلا أسلمد أنافلا ( التعليم العالي)……
تاغاوسا تيس سنات أر تاكا ئ ؤنفران أزرف ن تووري أد ؤكان ؤر ئتاكر أوال ” أر ئتغواغ” غ ؤݣنس ن تداليوين ن تسداويت ( الجامعة) نا ژلينين س توتلايين ياضنين. سول هاتي ؤر أغ ئتافا بو ئسنوبوشن ن تسكلا تامازيغت نا ئران أد ئغييز ئسنتال نس ما سرس ئسبراكن أبلا دروس دروس أشكو تكا غين تيديولوجيت ف توسنا.
تيس كراط تغاوسيوين أر تاجا أنفران أد ئسبوغلو تارمييت نس تانفرانت ( تجربة أدبية) ياف ݣيس جميل ن ؤسݣودي لي ئلان غ ئضريصن ؤلا أناو لي ݣان. ئژضار أك غيلاد أد ئسمستاي غ تووريوين. ئمزيليل تينمال د ئسافن ن ؤسنفلول. ليغ لانت تيغاوسيوين أد ژضارنت أد د أوينت لمنزل ما غ ئتبوغلو ؤفران أمازيغ أماينو. تيووريوين لي غ راد ت ياوي هاتنتيد:
١_ ئغ ئݣا ؤفران أمازيغ غ ؤسان ن تلاليت نس يان واناو ن ” هايي ليغ”، أفݣان ئميار يادلي س تفݣانييت نس أدْ ئتماتياي غ تزمرت ن ما غ ئسكار ئديس ييلي ن د مدن س تزمرت ن ؤسغودو د ؤسنݣيدي د ؤسبوغلو. غيد أدْ دْ تْكَّا تووري لي كولو ئستاوهمان ن ؤفران أسكلان تيزي أد، ئݣا ت ؤستال د ؤزراو . غيلاد ليغ تسوفا تݣراوت (جماعة) أوال نس تكشم تمازيغت س تمرسال، تلكم توالا أد ت ئسوفو ؤلا ؤمسنفلول (المبدع)، ئسوفو ت ولا ؤضريص( النص) ئغ ئلا د ؤݣايو نس. غيكاد ؤر ت نوفي ئغ ؤر لينت كرا ن ترسال ن ؤفولكي دوسنين ( معايير الحكم الجمالي). هيا ئلا فلاغ أد نسرس ف ؤسݣا تانايت لي تاقبورت ف ئضريصن ن تايسي. أد ؤر نتو ؤلا غويد تيارانين نضي تن د غ ؤنخيسام ن تغنسا ( ما ئسدوسن تانايت أد، ئغ ياد نزري أفساي ن ؤنخيسام ن تماݣيت، أد ئغييز ؤسموتݣ ن ئنفران، ئزدي ن د تووريوين نسن غ تمرسال ن ؤسلمد ( مؤسسات التعليم) س يان تستراتيجيت لي غ را تمون توسنا تاماسانت ( المعرفة العلمية) د ئمان أسكلان ( الحس الأدبي) د ؤفراك أسرتان ( الوعي السياسي).
٢_ أفران أد راد ئسكر أمحاس ئسكر أژماژل لي ئرا لحال، ئفك ئ تيرا ن تسكلا تيژيرت تاسيمانت( نظرية مستقلة). نتان أر أد ئسمكتي شغل أد، ئعدل ئماسن ن ؤفران، ئطاي د تيبريدين، ئسبوغلو ئݣوديين ن تووريوين، ئسݣراول تنت س ما يوفن.
٣_ تاژلايت غ ؤفران تݣا كرا ن تاغاوسا ن توسنا. أج تيژلايين لي س ؤكان تيريرن ئد بو تماݣيت نا رانين أد أس سمدن تودرت أرينت ت غ ؤسمدورو. تاژلايت ن تووري تاسكلانت تامازيغت ؤر ت ئݣي بلا ئغ ناحيا أسنفلول، نوحيو أسكير ن ؤضريص. أفران ؤر أغ تّْ سول ئتاوي غ تژلايين ن تدلسا لي لانين غ تومايت ( المحتوى). أر ت ئتاوي غ تژلايين ن واوال د ئݣنسيون ن توتلايت لي ئسكارن غ تسكلا تاسكلا ئبدن ف ئضارن نس. أسماقل أد أسكلان أر أد ئِسّْدْرُو أرموس ن ” تژلايت” زغ ما ئݣا ناحيا ؤژلاي أر کيغ داغ ئݣا أنييلكام د مدن س ما ئتسمودن كرا ئ ئمصطيرن ن تفݣانييت.
٤_ أسكر ن تووري أد تَامَاسَّانْتْ ئغييزن غ ؤفران نتات أر أد ئضي دلحينت تيݣوريوين، تضيد توتلايت ن ؤسنومل ( اللغة الواصفة)(( ختاد تستاوهما باهرا غ ؤفران أمازيغ أماينو، تدرا ئبد ݣيس لحال، أشكو تايافوت ن ئسنوبوشن س ئماسن ن تعرابت د تفرانسيست غ ئضريضن ئمازيغن ؤر أد ياف أد ئسفرو تاسكلا تامازيغت د ؤفولكي مقار أغ ت تسنتال تغاراست ن تومايت ( مقاربة تيماتية))، تْسدرو تموكريست ن تبريدت (إشكالية المنهج) ن ؤسنوبش د ؤسمستي. نتات أر أد تيد ئضي زّْغْ تزمرت لي غ كا طارنت تبريدين د تانايين تيبرانيين ف تسكلا تامازيغت س هاكاك س تاياض ليغ راد توسكارن ئماسن ما س ئسووري ؤفران ، ئكس ن ئ تژلايت تاسكلانت ن ؤضريص. تاغاوسا لي راد ؤر ييلي بلا كيغ نوت تاوادا لي ئݣران. زعما أد ئتوسكار ؤفران ن تمازيغت س تمازيغت نيت. غيكلي كولو ئلان غ كرايݣات تاسكلا ؤلا تادلسا غ ئݣي ن تادارت ن دونيت.
ئژضار أك تاژلايت ن تبريدت أد ؤر تݣ تاژلايت ن تووري تاسكلانت أشكو توݣت ن تغاوسيوين أد ن تسكلا ݣانت أك تيماضلانين، أر سمونانت تافݣانييت. د ؤر ئلي ما جو ئسكر تابريدت ئحوران ئفغ واناس، أشكو كرا أر د ئطامز غ دار كرا. ئس كا ئخصا أد نوت تاكرايت غ دار تژيرين أشكو راد سونت غ غيلي غ د نكرنت أفاد راد أغ د مشيشكينت د ئضريصن ن تسكلا. تابريدت تانفرانت ( منهج نقدي) ئلا فلاس أد د تك أضريص د تمژلاي نس. نتات أر أد ئضفر أَضريص، ؤر د أد أس تزوور ئضفر ت نتان. غيكان را ئفك تايافوت لي را ن ؤر ئتام يان. ماش ئغ لان ئنفران شرمضنين، س غيكلي ت ئݣان غ توسنا. زود ميدن أد ؤر أد د كين بلا تاسداويت(الجامعة) سلاواند أك ݣيسن ئد بو تمازيغت د تسكلا نس. هيا ؤر داغ نكي ماني ئ أد تيلي تدالا (قسم،شعبة) ئژلين س تمازيغت غ تسداويت تامغريبيت.
٥_ أسنفلول غ ؤماوال ئطاف ؤلا نتان تاغامت نس غ ئݣر ن ؤفران أسكلان. نتان يادلي ئݣا يات تبايطارت مقورن غ ؤغاراس ن تلاليت ن ؤفران ن تمازيغت س تمازيغت. والانت يادلي غار ئمغناسن د ويلي غ تلا تايري نس. غيلاد درونت مناو ئفاسن، ئد بو ؤسلمد ؤلا تابادوت ؤلا ئد بو تژوري د تسكلا د تودرت تانامونت ؤلا تادلسانت(الحياة الثقافية والاجتماعية). أيلي رادْ دْ ئسحورو ئماوالن ژلينين س ؤفران باش أد نيت منيويين د ويلي توسكارنين ليغ تكشم تمازيغت س ئݣر ن ؤسلمد(مجال التعليم). ماخشاي أد ييلي ؤمياواس ݣر ئمسنيلسن(علماء اللسان) د ئنفران(النقاد) د ئمسنفلولن( المبدعون) غ ئماران ؤلا ئمسِّيوْلْن. يات ياضنين هان تيݣوريوين ن ؤفران لانت ئس كا حضانت،ݣانت تانايين، ئلينت غ تايسي تاميوانت. ئميك ن تژيضار أد تنت ئخصان سيغ د فاغنت. أما تيݣوريوين ن ؤفران أماينو تژضار توافوغت(الاشتقاق) أد تنت تفك ؤلا توتلايت تمازيغت تاماينوت(اللغة الأمازيغية الحديثة ويقصد الوضع).
٦_ ئلا ف ؤفران أمازيغ أماينو أد ؤر ئبد غار غ تغري ن ئضريصن د ؤسنوبش غ تژوري نس د تومايت نس. ئلا فلاس ؤلا أد ئزري غانشكان ئسيݣل حتا ئس أغ ئزوݣاز، د ماني ئلكم، د ما ئمال غ دار تغري، د ما ف ئلكم ئمغري، د ما ئتوهام، ؤلا أسوير ليغ ئلا ؤمسنفلول أقبور، ؤلا غيلي تلكم توتلايت غ وامون ( المجتمع) ؤلا غ ؤݣنس ن تمرسال. تيغاوسيوين أد أر سيسفيونت أسووري ن ؤضريص أسكلان أمازيغ، واد ئتياران ؤلا أميوان د ؤسبوغلو نسن.
تاسرݣلت ( خاتمة):
ئغ را نسكر ئژموزال أد ستاوهمانين ئلا فلاغ أد أسن نحييل، ناف لمنزل لي راد أغ ئسلكم. شرض زوارن ئݣا ت ؤمياواس ف تغاوسيوين أد نݣر تمسمونين د ؤسيناݣ أݣلدان ن توسنا تامازيغت د تماواست ن تدلسا د تعورما د تونونت ؤلا تيمرسال ياضنين لي سوورينين غ تدلسا د تعورما :
_ أسكر ن تسوتولين ن ؤسموتݣ ( دورات تكوينية) ف ؤفران أسكلان د تبريدين نس د ئموكريسن نس د ؤسكر ن تسيوار ن تيرا ( ورشات الكتابة) لي غ راد تييريمن ئضريصن ن تسكلا تامازيغت.
_ أد ئتوسكار يان ؤماني ما غ ئتيلي ؤفران أسكلان زود كرا ن تْسْغُونْتْ ( مجلة). أوتاس نس أد ت ئݣ ؤسموتݣ ن يات تاسوت ن ئنفران. د ؤسمغر ن تيرا ن ؤفران س تمازيغت. ؤلا أسهيما س تينمال ن ؤفران د ئسافن نس د ؤسيݣل نسن.
_ أد ئلين ئݣراون د ئݣيور ن ؤسوينݣم د واوال ن ؤفران ف تووريوين تيماينوتين ن تسكلا، ئلين ئلموقارن ن تغري غ ئدليسن غ تداليوين تيماتايين(قاعات عمومية) د “لقهاوي ن تسكلا” نغ ئݣيور ئژلين س ئد باب ن تغاوسيوين أد د ئمسنفلولن زود تيدواريين ن تسكلا (صالونات أدبية).
_ أسهيما د ؤسمغر ن ؤسنفلول أسكلان غ تريوانت سلاواند أك ئعريمن. أشكو أناون أد أر سبوغلون توتلايت، ؤلا أضفور نس س ؤفران.
_ أسمغر ن تمسمونين لي ت تاوينين غ تيرا، أر سمونانت ئماران(الكتاب) ن تمازيغت زود تامسمونت ن ” تيرا” غ ؤݣادير.أشكو أر سكارنت ئلموقان غ نݣر ئعريمن ئماران ما غ ئتيلي ؤمساوال أسكلان. ييلي ݣيس ما غ تبوغلونت ترميين نسن فِيوْنتْ تانايين نسن لي سموسونين أسنفلول غ ؤباراز ن تسكلا تامازيغت.
_ أد ئلين ئمحيزوارن (المسابقات) غ ؤفران أسكلان، ئلينت ݣيس تسمغورين ستاوهمانين زود تين ؤسنفلول سول فغنت د تووريوين نا ييوين أمحيزوار توسانت.
_ أد ييلي يان ؤغاواس غ تبادوت ما ئسهيمان س ؤدليس أمازيغ ن ؤسنفلول. ئلينت ݣيس حتا تانايين ف ما ئتيوران.
ئژموژال أد ݣان يات توارݣيت ئحلان. ئغ تݣا صاحت هيا راد تݣ تانکرا ن تسكلا د ؤفران ن تمازيغت. تانكرا أن داغ راد تروو ئ ؤسوير ليغ تلا توتلايت د تماݣيت د تدلسا تمازيغت غ نݣر ئنوشوݣن ن وامون غ لمغرب.

يورات احمد عصيد
أسموزّْغ ن إسماعيل أبلق
تيزنيت غ 2 ماي 2024