ئمال ن ؤماركَ

ئزد ئرا د ؤنغوبو تادَّارت ن ؤمارݣ؟..ئزد را ئمدورو ؤسكر ن ؤمارݣ غ ما ن ؤر ياݣوݣن؟..

ئفاغ ت شك ئس سوتلنت تكصاض ئ تودرت ن ؤمارݣ. ؤر د حرا كا لانت غار غاساد، لانت كولو ما تکا تفݣانييت أر تݣريويل. أمدياز لي ت ئِنّْ ئكان أر ئتال تاقبيلت نغ أس يودر ئسيافا تيكصاض ف وادُّور نس، ليغ توري تقبيلت تݣ أوانك(دولة). ؤر أغ سول ئساوال س ئلس ن لجماعت. أر سول ئساوال غار س ئلس ن يان ؤفݣان: كرا ن ؤݣليد نغ كرا ن ؤنمغور. ليغ د داغ ئماتي ؤوانك غ تنباضت ن تموغرا (أرستقراطية) س تنباضت تاݣدودانت(ديمقراطية) ئسنفل داغ ئلس ن ؤݣليد د ؤنمغور س ئلس نس نتا. أفاد أد د ئمل ما ئلان غ ئخف نس.

أر غيلاد ؤر تا جو ئلكيم ؤݣري أمارݣ س ئخف نس، مقار نيت ئسلي كرا غ واتيݣ نس أسرتان، ئكري د أضار نس دار ؤݣدود.

أما أݣري لي كصوضن ئمديازن أد ت ييلي ؤمارݣ. تݣا ت ” تاماسانت”(العلم) لي د ئݣران غ تميضي تيس طژات د مراوت. ئس ؤر د ئس تݣا يات تمجيوشت لي ئسنخابالن ئفالان ن تفݣانييت، تسنفل تانايين نس ف تغاوسيوين.

نان يات تكليت ئنكر ؤمدياز ” كيتس” غ يان غييض دار يان ئمنسي ياسي لكاس ن تمقيت أد ئسو يات تيسي ناحيا ت أك، ئنا ” أد ݣيسنت ئنعل ربي *نيوتن* ” ليغ ت سقسان ئنبݣيون ما ن ݣيس ئكا، ئنا أسن : أشكو نيوتن أد ئسكلولان ئژري نغ ئسنفل أسماقل نغ س تسليت ن ؤنژار، ليغ أغ ت ئفاسر س تاماسانت زود كولو تيغاوسيوين” غاكودان أد ن كولو سوان ئماريرن يان لكاس ما س ت كولو تنعالن.

زرين ؤسان ملين أغ د ئس ؤر تژضار تماسانت أد د تلوح أغراب ن ؤمارݣ. غيكلي س ؤر تژضار أد تلوح وين ؤسݣد(دين). ئخس ن تژوري ؤلا وين ؤسݣد ؤر أد ئتوتشي، مقار د تݣورا تماسانت را ديدس أمژن أشبار.

تاسليت ن ؤنژار تژضار سول أد تيلي غ يات تمديازت ن غاساد ؤلا تين ؤسكا. را ݣيس ئتزرير ؤمدياز س وافولكي لي س تاوي لخاطر كيغ ئفاوجا لحال ؤلا كيغ ئدل. ؤر أن أك ئقيل ما غ تياوسكار غ دار ئماسان ؤلا ئقيل ن تيژيرين ن توفاوت( نظريات ضوئية).

تَازِّيتْ ن لْكْمِّيتْ ؤلا نتات را بدا تݣ تماتارت ن شقاوت د ئميغ. راد ؤكان تسمرغا  غ نݣر ئواليون ن ؤمارݣ كرا تكا دونيت تلا.  ؤر أد ئبالا وافولكي نس مقارد ئݣرا صاروخ ؤلا ما ت ئضرعان.

أيور راد ؤكان تحييال نّْقّْرْتْ ن ئژنژارن نس غ واضان ئ دونيت، مقار د نسن کيݣان ن توسنيوين ف واكال نس. ؤر نژضار أد نيني ئ ئماراين د ئماران : نكرات أوي، هان ؤر كنْ تجلي بلا تايري ن يات توجَّا غ أك ؤر تلي تودرت. ؤر ݣيس أمان ؤلا توفاوت. كّْينْ تّْ غار ئدرارن ن لعفييت خسينين.

تاوسنا نغ خْف وايور ؤر أد أغ تكيس أد نحمل ئميك أن ن توفاوت لي د ئتلوح ؤلا راد ن فلاغ ئبي نتان غايد نسيافا غ لخواطير نغ د ؤمارݣ.

ماحد ئلا ئمان ئژلي د ئخف، هان أمارݣ ؤر ئكصوض يات غ تماسانت.

ماش..مقار غيكان أمارݣ غ ؤزمز أد نغ أماينو أر د ئتيوسار. ئدا س ؤنغوبو نغ ما ت ئرواسن. أمارير نا ؤكان ئدان ؤر أد ئفال واياض. أماكاز ن واوال نا ؤکان ئفتان ييليح ئمكاسان نس. كرا ئݣان أمالاس ن ؤمارݣ ئس ئنغوبا.

نضوف غيكاد غ كرا ئݣان ماني. تيسدليسن ؤر أد طايت تادليوين ن ؤمارݣ ئغ ؤر قِّيلْنْتْ س ما غ فالنت، سّْنّْتْ ؤكان ئس ؤر ئتكون ؤميا ؤلا ئلا صاحا. أر ن كا تݣانت غ جرت.

ماخ؟..غواد أد ئݣان أݣري!..أݣري لي راد ييلي ؤمارݣ؟..

  _ نكي غ تانايت ئنو_  ئكا د لحال ݣار تادلسا. تادلسا ئزبوبن لي ئلان دار ئݣدودن ن واكال. فكان ت ؤكان ئ تغري ماش غار كرا ن تغري ئفسوسن ن تْفْرْكِّيتْ. يات ربيعت ن ئماكازن عدلنين لي لانين ن تژوري ئدوسن دان نيت فسين غ ئد مليون ن ݣار ئنلمادن.  ئسافن أد ن مدن لي ؤر تا نيالكامنين د تدلسا ؤسين غار ݣار تادلسا. سول أمژن دونيت أݣماض س وايا. نتنين ؤكان أد ئمالن ئ ئمسنفلولن د ئد بو ئسوفوغن ما د ران.

أمارݣ أد ئݣان أديف ن تدلسا، ئݣ أسلال ن ؤمطاي. غيكان أف ئݣا يات تژوري ئدران. ئميك ن ئواليون ئكشم تن كيݣان ما ن تاكزن ئد بو ؤرماس ئدران.

ؤر د زود تاريوانت( نثر) لي ئݣان يات تژوري لي غ تلا تفريز ن واوال د ؤفاسر نس. أر د تاوي كولو ئبرزوزوين ؤلا توسنيوين ؤلا حتا أضرموس ئ ميدن حلبن ت بلا تاكرايت.

أمارݣ نتان ئݣا غار ئ أد ييدروس ييدوس. ئقل أد ن ياف دار ؤمسفلد يات تدلسا د يان ؤمطاي ئتاكزن. ؤر ئݣي زود تيرمت أد ت ئن كا تلوحت غ ئمي فژن ت مدن. ئݣا يات لمساوية ياتوين ن ئمان ئخصا أد يادلي نݣيدين ئدينان أفاد أد فلاس ضرن.

أسنݣيدي أن أد ؤر تا كولو ؤفينت تمقا ن ئسافن أد ن ميدن لي ݣانين ئݣدودن. أيوا ليغ ئتنرو ؤماݣوت، راد ئسدمر ؤمون(المجتمع) ئ تغوري ن ئكابارن ݣوتنين. ما مي أقران؟ ران ما ئرخان، هيا تاريوانت.

ؤر د كولو تاريوانت أشكو ݣيس ختاد ئتنيون د ؤمارݣ، تيدروس تيدوس تيفسوس. حتا ختاد راد ت سيتين نغ أس ݣان تاقايت أد باهرا تكري.

هيا ما را ئرژم ئ تفارين أر ئتكا دونيت بلا زود تيرمت لي س ئژضار كويان ئ واتيݣ نس أد ت ئفك ئفرد ݣيس.

تيرمت أن يادلي ؤر أد ت ئݣ ؤمارݣ ئزديݣن.

مان أسر أر أد ئنفل ماياد؟ نغ أك ئنغوبا ؤمارݣ؟

ئغ أك ئنغوبا ؤمارݣ يان واس غ ؤسان؟ ئس ئرا أد ئنغوبو ؤمارير؟

أناو أد غ ؤفݣان لي ؤر ئطيفن ئكنو نس. غواد لي ئلان غ ؤݣاما غ نݣر ويياض كولو ديدس ناحيا.

غواد لي ف ئنا ” مورياك” : ” ما ئݣا ؤرݣاز أد لي ئساوالن س لعبار، أر ئژيݣيز س بجݣي؟ ؤر أد ئݣ بلا يان غ ئد بو ئد مليون نغ ئوالا كرا ن ؤݣادير ن لقش”.

برا أ لباس.. غوان ؤر ئݣي بلا يان ” ؤمدياز”، يان غ ئد بو ئواليون. أما بجݣي أن ؤر ئݣي بلا يات تغنانت لي ئغي أر سرس ئتݣا أتيݣ ئ ئخف نس.

ئمديازن ئنغا تن شك غ ؤݣنس ن تاسوين نسن، أر تنت ئتامس. لكمن فلاغ أد تن ئن ؤكان نقيل أفاد أد ؤر قنضن. أݣضيض أد لي ؤكان ئصينصيݣن غ تفسوت. غواد لي ؤكان ئتيريرن ئغ طاسن ميدن. غواد لي مي تينين أمارير ؤر تا جو ئزݣا ئس ئلا كرا ن ؤمزوغ أس ئسفليدن.. أر أقلاينت تورارين نس أر دار ئتران أغولنت د س ؤل نس. نكني ئغ نفس أر ݣيݣنغ ئتݣا غانشكان لغدرت د ݣار. ئس تسنت ئغ ئنݣارا ؤمارير د ؤݣايو نس، ئنا د شيض س ئمي نس، ئنتع أغ س ئضوضان، ئحرج أر د ئکات س تاكات، ؤر فلاغ ئلا بلا أد أس نفسا، أشكو ئس كولو ݣان مدن ن واكال أد ئضرضار، زود ئغ ؤر سفليدن ئ تييات نس.

ماش ئس يادلي زوار ئرخا أد كولو تسلان مدن ئ تييات، ئلين غ ؤسوير ن واماݣن لي د ئتاوي؟ ئݣوم ت حاقان غار ئغ ئلا ئميك ن ؤسهيما. نتان ؤر ئلكيم بلا ف ما ياكان توݣا ئس ئلا. أد تنا تمتي (أمة) نس ترا ت. تتياوفكا أس يادلي توݣا أد غ ما ئزرين. ماخ ئلا ما را ئنا ” لمتنبئ” ؤر ئطيف أتيݣ سرس ئليقن غ تمورت نس سول ئغ تنيت أتيݣ. د ئس ئلا ما را ئنا ؤروبا تتو جميل ئ ئماريرن نس د ئمسنفلولن نس ن تسكلا، سول س غيلاد نيت.

ؤر تن تتو غ ؤسمغر لي راد أسن ئغرم ئميك غ تيكي لي أسن ئدان غ ؤزمز أد أماينو.  تينباضين ن تاݣوت ؤلا ئݣدودن نس ئغ أك ؤر ژضارن أد فكين ئ ؤمدياز ؤلا بو تسكلا ئدريمن د ؤسهيما أر ت كا سيمغورن سكرن أس تيولافين د تفوݣليوين ن ؤكتاي. أر سيمغورن أراتن نس، بدرن تيووريوين نس.

أما أݣموض نتا؟.. أما ماصر؟ لان كرا ن لغشما أر سقسان غ لبعض ن تواليوين نان: ماخ ؤر أد طاين ئدبو تسكلا د ؤمارݣ زود ئنݣان نسن غ تاݣوت؟ نكي أر تينيغ مانيك أد كا سكرن باعد ليغ د كا سول طاين ؟ ما تن ئن ئدحين أد ن ضرن؟

أبداد أد لي بدن ئد بوتسكلا د ؤمارݣ غيلاد هان تݣا لعجب ن ئژري.. ؤر جو ئلي ما ئسكرن غيكاد غ كرا ن ؤزمز غ ئزماز . أيلي نميار ئݣا ت كرايݣات تاسكلا أر تيلي كرا ن تسكا غ تسكيوين ن ؤݣدود أر ت تاسي. غ ما ئزرين ئكا ت ئن ؤسين ت ئنمغورن د ئد بو تاكا. أر ت ݣيس تاوين، قيلن ت ئن. أر أك تنيون ف ؤسمغر نس. أما غ ؤزمز أد لي غ سول ؤر تلي تارسكيلت (الأمية) هان توالا دار ؤݣدود لي ئغران. نتان أد ئِفْرُّونْ ئ ئدبو تسكلا أر ن ئتݣوداي ف ئدليسن نس أر سرس ئسفوݣلا ئسمغور ت.

تاسكلا نغ نكني زود تيݣيݣيلت. أر تکا نݣر ئد بو ئدريمن لي ؤر تهول تسكلا ؤلا أمارݣ، د ؤݣدود لي ؤر ئغرين يات ئغ أك ئرا ما ئسكار ؤر أس يوفي.  ئماران د ئماريرن ئس أغ كا كرزن تيرا ئما سن ئس ؤر هولنت ئد بو شيض ؤلا ئد بو ژلض.

تانباضت ن إنݣليز أس لي تسيافا ئس ئلا ؤدليس أنݣليزي غ تاساست ؤلا أوينݣم نس: زود تاسكلا د ؤمارݣ د تژوري د تماسانت، ئتياقن نيت ؤماوساس(الوزير) لي ئژلين س تغاوسيوين أد ئسيݣل نيت ئقاريضن _ توماض ن وافضان ن ئد جنيه_ ئفك تن ئن غ ؤوينݣم أنݣليزي غ برا ن تمازيرت أفاد أد ئغاما غ ؤسوير لي غ ئلا، بلا تايسن ئماران ؤلا فلن غ تيرا د ؤسوفغ.

أما غ ماصر تينباضين أر تاجانت ئدليسن ن تسكلا ݣين زود أقاين ن روژ د لقضن د سكر. ئلين فلاسن ئكرافن ن تسبابت د ؤدريم. أيوا أݣورن د غ ئفاسن ن ئد باب نسن ؤر سين ما راد سرسن سكرن ؤلا ما مو تن يادلي سكرن.

أسݣا أن ئلا ݣيس سيعر ن ؤوينݣم أنامور . أسݣا أد ؤهو ئس كا ݣيس طاسنت تينباضين، ئغ ؤر ئݣي ئس أغ تبينت ئبزورن ئ ؤوينݣم أعراب .

ئسيݣرا ئلما نان ئ ئماران: أيوا تارايات زود ئماران ن ؤروبا. نان ئ ئمديازن : أيوا كن تيريرات زود ئمديازن ئماضلان. 

أسّوغل ن اسماعيل أبلق

تافراوت غ 14 ماي 2024