ؤر رايكَ أسفار ئوْترس أبلا كيم

أتامنت زضان ئكليفن ن دارنخ.
ؤر رايك ئسوتار ئتكما بلا كيي.
أياصغار ن واداكن ئسو لعين نخ.
ئزاد يان لمنزل باكند فلاخ.
ئزلف كولو س لهيف نس ئكران نخ.
يوت لحباق نون آ لحوض ئجدرتنت.
أكا ئخلف ربي تيغراض ن تعالين.
ئسيلف ئي ووزون ن لحنا ئكلين.
ما راسول تغمامت آتيرباتين.
ئسويل ئكنباش إملاد تيدلالين.
ئسوكا كند آ يودماون حبانين.
تازولت ئفي تنت ئرزا تيكفاس نس.
رزان أخلخال ئرزا تانبالين.
مان أك رايي تلكم توالا غ ووال.
واليد جمعاخ ئنا فيس أد ساولخ.
أ ليغ نوفا أزمز ئنو ئس اسد نيخ.
ار ئتيني شرع ئنا ذو الجلال.
ئنايخ أجاتين لخبار ئي آكنوان.
غساد وي واكال أس ريخ أد فروخ.
اد نسووري تغامت ئي تيمغارين .
أد نمل ئي أوركاز ئست ئكا اوغراس.
أوال ف اوفلا سوكتن لاخبار نس.
ولايني ؤر كيسن قصادن علا خير.
ؤر ئك لهم اكيسن ن تاوجيوين.
ؤلا ؤسين كن آسيعر ن تيمغارين.
ياك ئيد كا تمارا ن ويلي برينين
آييسان أكوراي يوتن لكومان.
زود ئركازن زود توتمين مدن رمين.
ماخ ئلا ئنك ؤر ئكمضن غ تاكات.
يان مناو ؤكان أيكان مك دا ران.
ويياض غار ئس اكا تحاسابن ؤسان.
ويلي إغين ؤكوك است أطون د مراو.
تانوضفي شركنت لميامي د لالوف.
ترمي غ تيزي نيريت سول ئيوغاراس.
ربي ملاتي مامنك زا رايك لحال؟؟

عبدالرحمان وادالرحمة. طاطا 02/01/2025.