تيكَمّي مقّورن

تيݣمّي مْقّورْن

نْكِّي تّْخْمِّيمْ نْ تُوصْكِيوِينْ أَدّْ ئِوِيخْ
تِيلِّي ئِݣَانْ أَكَالْ أَرْ تْنْ كَا سِّيژِينْتْ
ؤُرَا تّْعْمَّارْنْتْ ئِژْرِي يَّانْ ئِژْرَّانْ
ؤُلَا تّْيَامَانّْتْ ئِغْ ݣِيسْنْتْ ئِژّْلْ يَانْ
وَانَّا ئِݣَانْ كْرَا مَاشّْ غْ لْمُهْنْدِسِينْ
ئِلُوحْ تِيطّْ ئِضُوفْ أَغْرَابْ ئِوّْرْضْ ؤُكَانْ
ئِمَّا لْمِيزَانْ ئِݣَا لْعِيبْ أَ تّْ ئِدْ أَسِينْ
مَادّْ ئِزْوَارْنْ دَارْ لْبْنِي تِيغُوزِيوِينْ
أَدّْ ئِتّْرورْ ؤُݣْلْزِيمْ ݣِيسْ ئِ طْرْژِيوِينْ
ئِغْ نّْ يُوتْ ئِݣِّي وَّاطْلَسْ نْغْ ئِژُرَوانْ
يِيسَّانْ مَانْ أَكَالْ أَغْ دْ ئِتَّالْ ئِغْرْمَانْ
مَاشّْ أَيْدَا لَابُودّْ أَ تّْ مْلْكْنْتْ تْوْجِيوِينْ
بَابَا فْ بَابَاسْ أَرْ ئِخْسَانْ تّْمْضْلْنِينْ
ئِغْ نْزْدَاغْ نْسّْنْفُو غْ يَانْ ئِصْرْضْ ئِ يَانْ
نْرَا كْرَا نْ ؤُخَامْ أَغْ يَامِي تَازَّانِينْ
زُو تِيدّْوَارْيِّينْ نْ غْوِيلِّي سُوݣْرْنِينْ
زُودْ لْخْوَاطِيرْ مْشَاشْكَانِينْ رْژْمْنِينْ
نْرَا أَنْوَالْ ئِتُّوتْنْ سْ تِيرَامْ رْغَانِينْ
مَاشَّانْ غْ ؤُرُوكُو لِّي ؤُرْ ئِݣِينْ أَبْرْكَانْ

نْرَا يْغْرْبَانْ ئِدُوسْنْ أَ كُولُّو بْرّْمْنْ 

أَتُّويْنْ ؤُݣَّارْ نْ لَاصْوَارْ نْ تْمْدِينِينْ

لَّاهْ ئِرْحْمْ غْ مْدّْنْ زُونْدْ لْمُورَابِيطِينْ

غِينَّا يْفْرْغْنْ هَانّْ رّْكَابْ ئِلَّا دَارُونْ

نْرَا يْحُونَا نْ ئِݣِيوْرْ أَ دِّيوْنْ ݣَاوْرْغْ

مَاسَّا دْ مَاسّْ لِّي يِّي سْكْرْنِينْ أَدْ ئِلِيغْ

أَ يِّي مْلِينْ أَوَالْ نْ تْمِيزَارْ نْ دَارْنْغْ

نْرَا يْحُونَا مَاغْ نْتّْسْنْفُو كِيغْ رْمِيغْ

تِيوُّورْݣَا نْرْمِي تَاوْدِيوِينْ أَدْ نْكرْغْ 

نْرَا كْرَا وّْرْتي مَاغْ دْ نْكِّيسْ لْغْلاَّتْ 

أَرْ أَغْ ݣِيسْ ئِتِّيرِيرْ وِينُو دْ ئِزَاكَّانْ

نْرَا كْرَا مَّانِي غَا نْكْلَّا دْ لْعُوقُّولْ

نْكْلْ دْ وَاوَالْ ئِغُوسْنْ ؤُكَانْ نْغِي سْرْسْ

أَ تِّيغْزِيفْمْتْ أَ تِيخْزَانِينْ نْ دَارْنْغْ

ئِݣُّوتْ مَارَا دْ رْژْمْغْ دْ لْكَاغِيضْ نْسّْنْ تْ

ؤُلَا لْمْنْظَارْ أَ نّْ ئِسْمُوقُّولْ ئِݣْنْوَانْ

ݣِيدِّي يْزُورْنَ فَادّْ أَغْ دْ ؤُرْ ئِتَّاݣَّا يَانْ

نِّيخْ أَوْنْ ئِݣِيوْرْ لِّي نْرَا يَاݣُّوݣْ ؤُكَانْ 

ئِسْ سُّولْ ݣِيمْ أَ دُّونِيتْ يَانْ ؤُرْ ئِغُوشِّينْ

أَحِّينْتْ أَ بْنَّايْ ؤُرْ تَا يْسّْفْلْدْ ئِ يَاتْ

يُوجَادْ يَا وْحْشُوشْ ئِ غْوِيلِّي تْ رْهْنِّينْ

لْمِيعْنَا يَانْ ئِبُورْنْ أَسْ ئِدَّا دْ ؤُلُوفْ

لْحْرْكْتْ لِّي رَا يِّيغْژِينْ ئِ تْمْدُولِينْ

رْبَّايْتْ أَ صّْبْرْ ئِلِي دْ وِيلِّي مّْرْݣَانِينْ

زُودْ لْبْنِييَّا نْ رِّبي غْوَالِّي غْ ئِݣَا رُّوحْ

تَالُّوحْتْ ئِکَّا صّْنْصَارْ دَا تُّوجِيدْ ئِ “نُونْ”

أَرَانْ ݣِيسْ مْدّْنْ لِّي طّْژِينِينْ ئِغُويَّانْ 

وَانَّا ئِضْرْنْ ئِكُونْ ئِسْ رَا يَافْ أَدْ نْكْرْنْ

اسماعيل أبلق